Број на текстови објавени денес: 70

СДСМ: Советничката група на ВМРО-ДПМНЕ соучесник во еколошкото уништување на Дебрца

sdsm-debarca-1

Општинската организација на СДСМ од Дебарца реагира во врска со изградба на бетонска и асфалтна база и на рудник за експлозатација на варовник, кои сметаатдека се темпирани еколошки бомби во овој крај.

Ја пренесуваме нивната реакција во целост:

„Oткако на 46-та седница на Советот на општина Дебрца не помина точката за изградба на бетонска и асфалтна база во местноста „Царополе”, во атарот на село Ново Село, по барање на советничката група на ВМРО ДПМНЕ , експресно, за ден 21.11.2016 година свикана е 48-та седница на која на дневен ред повторно е поставена точката „за изградба на бетонската и асфалтната база, како и точката за рудникот за експлоатација на минерална суровина-варовник во местноста „Чифлиска Краста”, село Долно Средоречје. Станува збор за два проекти кои претставуваат темпирани еколошки бомби, во срцето на Дебрца.

И во оваа прилика, како советничка група го повторуваме нашиот став за наведените проекти, а кој кореспондира и со барањата на граѓаните, изразени на мирните протести. Цениме дека е недозволиво асфалтната база да се гради на плодно земјоделско земјиште, на локација која гравитира непосредно до населени места, до реката Сатеска, која е дел од сливното подрачје на Охридското Езеро и непосредно до природната реткост “Белчишкото блато”, кое е нашето најзачувано блато во оригинална форма. Во вчерашното соопштение Градоначалникот на општината се пофали со проект за Белчишкото блато, а во неговата изборна програма ветуваше негова заштита како природна реткост, а од друга страна советничката група на ВМРО ДПМНЕ дава поддршка на проекти кои ќе имаат несогледиви штетни последици по почвата, водата и воздухот, не само во локалитетот на блатото, туку и пошироката природна средина во Дебрца.

Истото се однесува и на рудникот за варовник, кој е во непосредна близина на неколку верски објекти во атарот на село Белчишта и до самото село.

Предлагаме, ваквите објекти да се изградат на друга локација, каде негативните еколошки влијанија би биле помали.

Воедно, апелираме до советниците на ВМРО ДПМНЕ и независниот советник да одлучуваат во интерес на граѓаните, а не профитерски и за тесни партиски интереси и да не ги поддржат наведените одлуки.

Во спротивно, ќе бидат соучесници во еколошкото уништување на Дебрца, велат од СДСМ.