Број на текстови објавени денес: 0

Македонец од Битола осуден на 18 години затвор за убиство на сопругата во Шведска

%d1%81%d0%bf31

Битолчанецот Киро Тошевски, кој живее во Шведска, е осуден на 18 години затвор за убиство на својата сопруга Весна, која ја избодел до смрт во гаража во шведскиот град Лунд.

Како што пренесуваат шведските медиуми, Тошевски се соочувал со доживотна казна затвор, но според шведските закони, за таква казна треба да има сторено повеќе убиства. Затоа, одбраната изјави дека нема да поднесе жалба на пресудата, затоа што сигурно нема да добие намалување на казната.

43-годишниот Тошевски на 19 април годинава ја следел својата 40-годишна сопруга до паркинг-гаража во Лунд, во јужниот дел од Шведска, каде ја нападнал со нож. Случаен минувач се обидел да ја спаси жената, но тогаш Тошевски го нападнал и него, по што тој избегал. Откако неколкупати ја избодел својата сопруга, Тошевски побегнал со автомобил и удрил во автобус во кој во моментот немало патници.

Откако полицијата го уапсила, над него било извршено психолошко вештачење, при што било заклучено дека во моментот на убиството тој бил во свесна состојба, непопречуван од ментална болест.

Тошевски на 10 април, пред убиството, бил пријавен во полиција за физичко насилство над повеќе членови од семејството, меѓу кои и сопругата. Тој во семејна расправија му удрил неколку шлаканици на синот во нивниот дом во Малме. Тогаш бил приведен, но на 13 април бил пуштен од притвор, а обвиненијата кон него биле отфрлени. Само неколку дена подоцна ја убил сопругата. Според пишувањето на шведските медиуми, кога Тошевски го признал убиството појаснил дека ја убил затоа што таа сакала да се разведе од него. Заедно имаат две деца.

Роднина на Тошевски вели дека тоа што се случило е страшно, и дека ако не го пуштеле од притвор поради тепањето, сопругата можеби сега ќе беше жива.

Тошевски треба да плати глоба од 315.000 шведски круни на жртвите на насилство.