Број на текстови објавени денес: 86

Гаранцијата не ви гарантира дека расипаниот апарат брзо ќе ви биде поправен

%d1%81%d0%b5%d1%80%d0%b2%d0%b8%d1%81%d0%b8%d1%80%d0%b0%d1%9a%d0%b5

Ви се случило ли сервисирањето на некој апарат кој се уште е во гарантен рок да трае подолго од она што е напишано во гарантниот лист? Ова е честа практика во земјава, потврдуваат и граѓани и Организацијата за заштита на потрошувачите. Граѓаните често и не знаат дали е тоа правилно или не.

Законски вообичаен период за поправка на дефект на апаратите во гарантен рок е 30 дена. Тоа го пишува и во гарантниот лист што го добиваат потрошувачите. За одделни производи дури има уште пократки рокови за поправка.

Овие правила ги знаат и овластените сервисери и трговците кои го продаваат апаратот, но често знаат да ги превидат или тоа да го скријат од граѓаните.

Граѓаните се жалат дека најчесто чекаат повеќе од еден месец, некои дури и два-три месеца за поправка на телевизор, машина за перење, ладилник или телефон.

– Ми се расипа телевизорот и во продавницата каде што го купив ми рекоа дека треба сама да го однесам во овластениот сервис. Ги ангажирав и соседите за да го пренесеме телевизорот во сервисот и сега чекам веќе два месеца да го поправат за да го земам. Гаранцијата е при крај и мислам дека намерно одолговлекуваат со поправката за да помине рокот и да ми наплатат. Пред тоа имав ист проблем и со машината за перење – вели Светлана С. од Скопје.

Од Организацијата на потрошувачи убедуваат дека тоа не смее да се случи.

– Прво сервисерот е должен да дојде дома кај потрошувачот да го поправи апаратот и за тоа има рок од 30 дена. Доколку станува збор за производ со потрајна употреба, должен е во тој период да обезбеди замена со друг производ којшто потрошувачот ќе може да го користи и да го зголеми времетраењето на гарантниот рок за периодот на поправка на апаратот – вели претседателката на Организацијата на потрошувачи, Марија Лончар-Велкова.

Таа додава дека трошоците за материјалот, резервните делови, работата, превозот и преносот на производот што настанале поради отстранување на дефектите, односно замена на производот со нов производ врз основа на гаранцијата, паѓаат на товар на давателот на гаранцијата.

– Доколку сервисот не го поправил производот во пропишаниот рок од 30 дена, тогаш, за пречекорување на рокот потрошувачот треба да ја извести надлежната инспекција – вели Лончар-Велкова.

Голем број граѓани се жалат дека имале проблем со докажување кај трговецот дека апаратот го сервисирале три пати во гарантниот рок за да го заменат апаратот со нов или да ги земат парите назад.

– Три пати го носев ладилникот на поправка во гарантен рок. Кога во продавницата побарав да ми го заменат или да ми ги вратат парите ми рекоа да донесам доказ за тоа. Потоа се посомневаа дека сум се договорил со сервисерот дека поправките се реализирани во гарантниот рок, па дека не биле три. Сега дури ми рекоа дека сервисерот требало да го поништи гарантниот рок оти ладилникот бил механички оштетен. Додека чекам помина и гарантниот рок и сега најверојатно ќе треба да купам нов – вели Златко Атанасовски.

За да се одбегнат вакви проблеми, велат од ОПМ, потрошувачите треба да следат одредени правила.

– Прво треба да го известат трговецот дека апаратот е расипан. Тоа е најдобро да го направат со писмено барање, не телефонски бидејќи телефонското пријавување на дефектот не може да се докаже. Трговецот треба да го ангажира сервисерот кој треба да дојде на лице место да го поправи апаратот или да каже дека тој не може да го направи тоа. Потрошувачот тогаш избира сервисер кој издава потврда за поправката и нејзиното чинење – објаснува Иво Костовски правен советник во ОПМ.

Од ОПМ појаснуваат и дека според Законот за заштита на потрошувачите, производот може да се сервисира најмногу три пати во гарантниот рок и доколку не се поправи, потрошувачот има право да бара да го замени производот со ист таков нов и исправен или да бара да му биде вратен платениот износ.

– Немате право да барате замена на производот или враќање на платениот износ доколку недостатокот што се сервисира е минимален, односно не влијае врз квалитетот и перформансите на основната функција на производот – појаснува Костовски.

Расипан производ, вели тој, не може да се бара да се сервисира бесплатно, ако е механички оштетен од страна на потрошувачот.

– Во такви случаи докажувањето од страна на сервисерот трае подолго. Механичката повреда од влага, удар, гребење не се признава како дефект во гарантен рок и тогаш потрошувачот сам ќе треба да го надомести поправањето – вели Костовски.

Во Организацијата на потрошувачите велат дека трговците генерално се трудат да го заобиколат Законот за заштита на потрошувачите и затоа нивниот телефон постојано ѕвони. Месечно имаат во просек по 148 поплаки кои се однесуваат најмногу на расипани апарати или неприфаќање на гаранцијата.